الحلاق دة واحد من أهم الشخصيات في حياة أي راجل أو شاب ممن لم يصبهم الصلع دة مفيش شك وأهميته جاية من كونه مسئول عن بعض من مظهرك الشخصي والحمد لله إنه مش مسئول عن كله طبعا .
وطبعا لأنك مستحيل تلاقي كل حاجة حلوة فطبيعة مهنة الحلاق بتفرض عليه إنه يكون واحد من أكتر الناس اللي بتكره إنك تروحلهم دة حتى قبل ما تعرفهم وروح شوف أي محل حلاقة بتاع أطفال هتلاقيهم يا إما بيعيطوا يا إما نايمين .. علاقة الراجل السيئة بالحلاق بتبدأ منذ نعومة الأظافر !
والحلاقين ليهم فلسفة غريبة جدا فالويكند بتاعهم يوم الإثنين وأنا شخصيا مش عارف إيه ممكن يتعمل في اليوم دة فهو زيه زي الثلاثاء والأربعاء يعني فالسؤال هنا : إيه الحكمة إن أجازتهم تبقى يوم الإثنين ومتبقاش الثلاثاء أو الأربعاء ، وليه متكونش أجازته يومين زي البنوك إثنين وثلاثاء مثلا ؟!
الحلاق من الناس اللي مبتحبش حد يتدخل في شغلها رغم إن شغله أصلا تدخل في شؤون الغير .. يعني مينفعش تقول للحلاق إعملي كذا وكذا لأنه هيعمل اللي في دماغه برضه ، هو إنت يعني عارف مصلحتك أكتر منه !
مش من مصلحتك أبدا طول ما فيه نقاش داير بينكوا وإنت بتحلق إنك تختلف معاه حتى لو رأيه دة كان خيالي .. ولا إنك تعمله إيجنور على فيسبوك ودة عن تجارب شخصية .
الحلاق دايما بيحب يحط التاتش بتاعته وغالبا مش هتعجبك يعني في 2010 سألني حلاق وهو بيحلقلي دقني .. أسيبلك الشنب ؟ يعني أنا فاكر أخر شنبين شوفتهم هما بتوع ياسر جلال وأحمد عبد العزيز ودة كفيل إنك تكره أي شعر بيطلع في وشك ، حصل مع واحد صاحبي طلب من حلاق يحددله دقنه راح الحلاق سأله بكل عفوية : زي جورج وسوف كدة ؟
وطبعا للأسف موقفنا ساعتها بيبقى صعب ومش بتعرف تحسسه بغلطه لأن في الحالات دي بيبقى الحلاق ماسك الموس والقوة بين إيديه وأي غلطة أو قلة عقل منه ممكن تكلفك كتير .. وساعتها هتحمد ربنا إن دوره بيقتصر على شعر الرأس واللحية بس :)
ومن حبنا للحلاق دايما مش بنفتكر نروح نحلق إلا يوم الإثنين .. وعلى كل الأحوال أتمنى إن إسلام " الحلاق بتاعي " ميشوفش البلوج دة
ليست هناك تعليقات:
إرسال تعليق